సినిమాలు, సెంటిమెంట్ ఎప్పుడూ కలిసే ఉంటాయి. ఇప్పుడే కాదు.. గతంలోనూ సినిమాల్లో సెంటిమెంట్ చాలా కీలకం. అయితే కొందరు మాత్రం సెంటిమెంటును పెద్దగా పట్టించుకోరు. ప్రస్తుతం ‘రామాయణం’ అనే చిత్రం బాలీవుడ్‌లో రూపొందుతోంది. ఈ సినిమాలో రాముడి పాత్రలో రణబీర్ కపూర్ నటిస్తుండగా.. సీతగా సాయి పల్లవి నటిస్తోంది. రావణుడి పాత్రలో హీరో యశ్ నటిస్తున్నాడు. ‘కేజీఎఫ్ 2’ తర్వాత అసలు యశ్ ఏ సినిమాతో ప్రేక్షకుల ముందుకు వస్తాడనేది అభిమానులకు ఆసక్తిగా ఉండేది. ఈ క్రమంలోనే ఒకవైపు ‘టాక్సిక్’ను లైన్‌లో పెట్టి.. ఇప్పుడు ‘రామాయణం’తో ప్రేక్షకుల ముందుకు రానున్నాడని తేలిపోయింది.
‘రామాయణం’ అనేది కొత్త కాన్సెప్ట్ ఏమీ కాదు. ఈ సినిమాకు సాంకేతికతను జోడించి మరీ హాలీవుడ్‌కు ఏమాత్రం తీసిపోని స్థాయిలో సినిమాను వెండితెరపై ఆవిష్కరించేందుకు సన్నాహాలు జరుగుతున్నాయి. ‘దంగ‌ల్‌’ ఫేమ్ నితీష్ తివారీ ద‌ర్శ‌క‌త్వం వ‌హిస్తున్న ఈ సినిమా రెండు భాగాలుగా రూపొందుతోంది. త‌న స్నేహితుడితో క‌లిసి యశ్ నిర్మిస్తున్న ఈ చిత్రంలో హనుమంతుడి పాత్రలో బాబిడియోల్ నటిస్తున్నారు. ఈ సినిమాకు సంబంధించిన తొలి భాగం షూటింగ్ దాదాపుగా ఎండింగ్‌కు చేరుకుంది. ఇక కీలక ఘట్టాల షూటింగ్ మాత్రమే మిగిలి ఉంది. ఈ క్రమంలోనే యశ్ సెట్స్‌లోకి అడుగు పెట్టబోతున్నాడు. ఈ క్రమంలోనే సెంటిమెంటును అనుసరిస్తూ ఉజ్జయిని మహాకాళేశ్వర ఆలయంలో యశ్ ప్రత్యేక పూజలు నిర్వహించారు. దీనికి సంబంధించిన వీడియోలు నెట్టింట వైరల్ అవుతున్నాయి.