నిఖిల్ దేవాదుల హీరోగా నటిస్తున్న సినిమా ‘ఘటికాచలం’. ఒయాసిస్ ఎంటర్ టైన్ మెంట్ బ్యానర్‌పై ప్రొడ్యూసర్ ఎంసీ రాజు ఈ చిత్రాన్ని నిర్మించారు. ఈ ఇంటెన్స్ సస్పెన్స్ థ్రిల్లర్‌కు అమర్ కామేపల్లి దర్శకత్వం వహించారు. ఈ సినిమాను మాస్ మూవీ మేకర్స్‌పై ప్రముఖ దర్శకుడు మారుతి, సక్సెస్ ఫుల్ ప్రొడ్యూసర్ ఎస్ కేఎన్ రిలీజ్ చేస్తున్నారు. ఈ నెల 31 ‘ఘటికాచలం’ విడుదల కానుంది. ఈ సినిమా ట్రైలర్‌ను హైదరాబాద్‌లో లాంఛ్ చేశారు. ఈ కార్యక్రమంలో డైరెక్టర్ అమర్ కామేపల్లి మాట్లాడుతూ.. ‘‘హారర్ మూవీస్ ఇష్టం లేదనే వారు సరైన హారర్ మూవీ చూడలేదని అనుకుంటాను. ఈ సినిమా టెక్నికల్ గా హై క్వాలిటీతో పాటు కథలో మంచి నావెల్టీ ఉంది. ఇది బొమ్మరిల్లు లాంటి సినిమా. అయితే ఇందులో హారర్, సస్పెన్స్ థ్రిల్లర్ అంశాలుంటాయి. తండ్రీకొడుకుల మధ్య ఉండే ఎమోషన్ ఆకట్టుకుంటుంది. ఇదొక రియల్ స్టోరీ. అది చాలా ఆసక్తిగా అనిపించి సినిమా తీశాం’’ అన్నారు.
ప్రొడ్యూసర్ ఎస్ కేఎన్ మాట్లాడుతూ.. ‘‘ఘటికాచలం’ సినిమాను మారుతి గారు చూసి బాగుందని చెబితే నేనూ చూశాను. నాకు బాగా నచ్చింది. సినిమా మొదలైన పది నిమిషాల్లోనే ఆ కథలోకి వెళ్లిపోతాం. అలాగే మన కళ్ల ముందే యదార్థ ఘటనలు జరుగుతున్నట్లు ఫీల్ అవుతాం. అలా ఎంగేజ్ చేస్తూనే చివరలో మంచి మెసేజ్ ఇచ్చారు. సినిమాలోని ఇంటెన్స్ సీన్స్ మిమ్మల్ని ఆకట్టుకుంటాయి. కొత్త వాళ్లు తమ టాలెంట్ చూపించాలంటే బెస్ట్ ఆప్షన్ హారర్ జానర్. ఎవరైనా తమ స్టోరీని హారర్ జానర్‌లో ఎఫెక్టివ్‌గా చెప్పవచ్చు. హారర్ మూవీస్ ను ఇష్టపడే ప్రేక్షకులు థియేటర్ లోనే “ఘటికాచలం” సినిమాను చూడండి. అప్పుడే హారర్ ఎఫెక్ట్ లు, బీజీఎంకు బాగా కనెక్ట్ అవుతారు. టికెట్ రేట్స్, పాప్ కార్న్ ధరలు.. ఇలా కొన్నింటి వల్ల థియేటర్స్‌కు ఆడియెన్స్ దూరమవుతున్నారు. ఈ క్రమంలోనే ఎక్కువ మంది ఆడియెన్స్‌ను తీసుకొచ్చేలా మన ఇండస్ట్రీ పెద్దలు ఆలోచనలు చేయాలి. అలా జరిగితే మిగతా అన్ని సమస్యలూ పరిష్కారమవుతాయి. ఐసీయూలోకి వచ్చిన పేషెంట్ కు ముందు పెడీక్యూర్, ఫేషియల్ చేయాలని అనుకోకూడదు. లైఫ్ కాపాడే ప్రయత్నం చేయాలి. ముందు మన సినిమాను థియేట్రికల్‌గా కాపాడుకోవాలి. మరో రెండు వారాల్లోపే రాజా సాబ్ సినిమా నుంచి అప్డేట్ రాబోతోంది’’ అన్నారు.
హీరో నిఖిల్ దేవాదుల మాట్లాడుతూ.. ‘‘నేను చైల్డ్ ఆర్టిస్టుగా 70 సినిమాల వరకూ చేశాను. ఇది హీరోగా నా మొదటి మూవీ. చాలా ఎఫర్ట్స్ పెట్టి.. టెక్నికల్ గా, స్క్రిప్ట్ పరంగా ప్రతి విషయంలో జాగ్రత్తలు తీసుకుంటూ ఈ సినిమా చేశాం. ఈ క్యారెక్టర్ నాకు ఛాలెంజింగ్‌గా అనిపించింది. తను ఒక్కో మూడ్‌ను బట్టి ఒక్కోలా బిహేవ్ చేస్తుంటాడు. షాట్ పర్పెక్ట్ గా వచ్చే వరకూ మా డైరెక్టర్ గారు కాంప్రమైజ్ కాలేదు. ఈ క్యారెక్టర్‌లో పర్ ఫార్మెన్స్ చూసుకున్నాక సంతృప్తిగా అనిపించింది’’ అని తెలిపాడు.
ప్రజావాణి చీదిరాల